1015. Þetta reddast!

Dagurinn í dag verður lengi í minnum hafður sem dagurinn þar sem allt reddaðist! OK. Næstum allt. Ég býð enn þá eftir því að nágranninn banki upp á og segist vera búinn að laga wifi-ið sitt og við getum því deilt nettengingunni með þeim. Væri rosa fínt að þeir færu að drífa sig í því, svona fyrir miðnætti nánar tiltekið, svo að þetta yrði dagurinn sem ALLT reddaðist. Næstum því.

Reddunin byrjaði á því að Einar fór í gaskompaníið. Við höfum sem sagt verið gaslaus og höfum því ekkert getað eldað og þurft að fara út að borða eða kaupa tilbúinn mat. Allir voða sorgmæddir yfir því. Ræskj. Og þetta hafði verið eitthvað vesen, þið vitið, ekkert social security number komið, hvar á eiginlega að lesa af mælinum (ekki „afmælinu-m“) og svo frv. En Einari gekk vel og gaskallinn átti að koma einhvern tímann milli 12-16 og ég varð að vera heima á meðan. Svo kom hann bara strax eftir tólf og við ÁG vorum því ekki innilokuð til fjögur. Eftir dramatíska leit að kjallara hússins fann gasstarfsmaðurinn mælana, las á þá og simmsalabimm við vorum komin með gas. Bara á svona örskömmum tíma.

Ég var rétt að jafna mig á gleðinni þegar dyrabjallan ómaði (mjög ómstrítt), ég rýk niður í forundran (svona í ljósi þess að ég þekki afar fáa hér í borg) og þar er maður með sendingu stílaða á Einar. Ég skyldi fyrst ekkert í því hvað þetta gæti verið ... þangað til að maðurinn gefur mér þá vísbendingu að þetta sé mjög mikið. Ó já, allir bókakassarnir, eldhúsdótið, fötin, leikföngin og já, kílóin 400 sem við sendum með skipi. Ég svitnaði af gleði og stressi yfir því hvað ég ætti að gera við þessi 400 kíló sem sátu þarna pent á gangstéttinni fyrir framan húsið mitt (og líka af hitanum, það var heitt, svitinn sko) og hvernig þetta ætti að komast upp á þriðju hæð. Var ég búin að segja ykkur það, við héldum að við værum að fara að búa á fjórðu hæð í lyftulausu húsi, en raunir er sú að við búum á þriðju hæð í lyftulausu húsi. Sá dagur hefur ekki liðið sem ég hef ekki lofað hvarf þessarar fjórðu hæðar, þegar ég held á ÁG í annarri hendi, með tösku/poka á öxlinni og kerru í hinni hendinni, upp á þriðju. Svona er þetta nú sniðugt, ef ég hefði aldrei haldið að ég væri að fara að búa á fjórðu hæð í lyftulausu húsi þá hefði ég aldrei glaðst yfir því að búa á þriðju hæð í lyftulausu húsi. Og það var sko vel þegið í dag að sleppa við síðustu hæðina, þegar við Einara snöruðum þessu upp á skömmum tíma bara við tvö. Ég sem hélt að við myndum þurfa að múta öllum sem við könnumst við hér til að hjálpa.

Svo ætlaði ég að skella mér í kalda sturtu eftir átökin. Svona kassa- og húsgagnaburður er ekkert grín sko í svona hita. En ég ætlaði aðallega í kalda sturtu vegna þess að við höfum verið heitavatnslaus. Við höfðum reynt að redda því áður, en lent í vandræðum. Ekkert social security number, þið skiljið, fórum á vitlausan stað og svona skemmtilegheit. En þar sem ég stend í sturtunni og bý mig undir kalda gusu, þá finn ég bara ylvolgan straum. Heitavatnið var bara allt í einu komið. Nú spyr maður sig, kom heita vatnið með gasinu? Það var allavega þannig á Spáni, að gasið hitaði vatnið. Hélt samt ekki að þetta væri svona hér ... en hvur veit. Mjög dularfullt. En mjög gott. Gátum eldað OG vaskað upp með heitu vatni OG hefðum getað drukkið úr sitthvoru glasinu ef við hefðum bara verið búin að taka upp úr kössunum. Sem við vorum ekki. Og erum ekki. Og guð má vita hvenær við verðum búin að því.

Held meira að segja að Einar hafi verið að panta handa mér tölvu ... svo að það er virkilega allt að reddast. Vantar bara sófa. Já og sjónvarp. Og kannski bókahillur. Einhverja hirslu inn á bað. Nýjar gardínur. Og netið auðvitað.

Ef þið drífið ykkur í heimsókn núna (ANNA RAGNHILDUR) þá fáið þið að hjálpa mér að taka upp úr kössum OG kannski auka ikeaferð... spennó?

1013.færsla. Er orðin kona einhvers, þ.e. Einars

Ég má ekkert vera að því að blogga.

Ég er gift. Húrra. Það var furðu gaman sko. Míní veisla sem var samt meiri veisla heldur en lagt var upp með í byrjun. Bara allra nánasta þó. Gott kjöt á grillið, freyðivín á palli, bjór í bala, rautt og hvítt. Luktir í trjám. Sæmilegt veður, þurrt að mestu en skýjað að mestu. Þó skein sólin líka. Kaka. Ís. Færðist aukið stuð í mannskapinn eftir því sem leið á kvöldið. Fólk var aðeins farið að slípa skóna á gólfinu.

Svo fór barnið í pössun til Kef. Við Einar fórum heim í glansandi fína íbúð sem svilkona mín og mágur höfðu skreytt fyrir okkur. Eyddum næsta degi í (sjaldséða, nú um stundir) leti. Fengum okkur að borða og fórum í bíó (í fyrsta skipti frá því áður en ÁG fæddist).

Já, bara unaðslegt.

Það eina sem hefði mátt vera betra var að kvöldið áður fékk ég í magann. Ég vil meina að þetta hafi ekki bara verið stress, því að þetta var bara eins og alvöru pest. Ég var því frá í undirbúningi kvöldið áður, gat ekki gert annað en legið á milli þess sem ég hlýddi kalli líkamans (sem var aðallega að kalla mig inn á bað). Lítið varð úr svefni og allt pínu á eftir áætlun af þessum sökum. Blessunarlega, og það var nú ekki lítill léttir, þá rjátlaðist þetta af mér um morguninn og ég var farin að geta borðað (og gat notið þess) í veislunni, jafnvel þó að maginn væri ekki allt of hress.

Ég ætlaði nú ekkert að skrifa um brúðkaupið, annað en það að ég er gift! Sem er undarlegt. Í gær var ég t.d. spurð hvort ég væri konan hans Einars. Ég þurfti að hugsa mig um í örstund. Ekki búin að venjast þessu, en samt er þetta svo ofurvenjulegt og breytir engu, þannig séð, skiljið þið. Þetta er enn eitt dæmið um það sem manni finnst að eigi að vera stór tímamót í lífi manns (og eru það kannski þegar litið er til baka) en er voða svona "jájá".

Allt annað en giftingin er óútkljáð og veldur mér þónokkru stressi. GAAAAAAA. Plís að þetta reddist allt fyrir horn takk fyrir.is. Einar er reyndar kominn með landvistarleyfi. Ekki ég. Ennþá. Þetta reddast. Vona ég. Held ég. Segjum það. Ekki spurning.

982.færsla. Helgin

Viðburðarík helgi.

Bíó: Okkar eigin Osló. Mjög skemmtileg

Fjölskyldumorgunkaffi hjá pabba. Gaman

Barnaafmæli. Gaman

Doktorsvörn. Áhugaverð

Doktorsveisla. Skemmtileg

Sund. Notó. Soldið kalt

Hádó á frú Berglaugu. Gott.

Bollubakstur: virðist hafa heppnast, þrátt fyrir að ég hafi gert heiðarlega tilraun til að klúðra þessu með því að lesa uppskriftina einhvern veginn kolvitlaust og blandaði því öllu saman í vitlausri röð. Þetta voru sko gerdeigsbollurnar, þær eru inni í ofninum. Mér finnst samt vatnsdegisbollur svo fyndnar. Það er ekkert í uppskriftinni! Enda er þær nátturulega mest bara loft þegar þær eru bakaðar:) En góðar samt.

Kaffihús: Ekki vitað hvernig verður af því að ég er ekki ennþá farin á það.

uppdeit: hrósaði happi of snemma. er aðeins búin ofbaka bollurnar ... held þetta sleppi samt

968.færsla. Helgin

Föstudagur. Vinna. Sund m/Ásu í bestu sundlaug í heimi (Kópavogslaugin, auðvitað). Grillpylsur heima með nokkrum vinum. Rölt niður í Hljómskálagarð á tónleika í sólinni. NICE.

Laugardagur. Bíltúr. Þingvellir, mesti hiti landsins þar þann daginn. Rölt um svæðið. Nesti á teppi. Sólbað. Gullfoss. Stokkseyri. Fjöruborðið, huuumar. Heim til Ástu í Grafarvoginum í spjall. AWSOME.

Sunnudagur. Reyta arfa af stéttinni (sko, ég elska að reynta arfa). Bónus með mömmu. Sund með mömmu, Önnu, hennar börnum og einu aukabarni. Kolaportið með Einari. Grillaðir hamborgarar og pottur á pallinum hjá Önnu með öllum fyrrnefndum + Adda og Helgu og þeirra börnum. NICE.

Brjálað gott veður.

Mega góð helgi. Mér líður ekki lengur eins og ég geri ekki neitt og sumarið sé að renna mér úr greipum. Húrra.

917.færsla. ágúst

Já, ég ætla bara að blogga "strax" aftur. Sorrý að ég nenni ekki að gera íslenskar gæsalappir á fartölvunni. Ég er löt:)

Núna um helgina var verslunarmannahelgin. Þið vitið. Við Einar vorum í mikilli óvissu um hvað við ætluðum að gera alveg fram á föstudaginn. Þá ákváðum við að við værum ekki að fara neitt yfir nótt. En gerðum samt alveg fullt.

Á föstudaginn unnum við (vinnu sko, ekki í lottóinu, eins sorglegt og það er, en lottóið er náttúrulega ekki á föstudögum og ég gleymi auk þess alltaf að taka þátt þrátt fyrir að það sé klárlega eðlileg framvinda lífsins að láta mig vinna í lottóinu núna, finnst mér) og fórum síðan í afmælismat í Keflavík, því að Svava systir hans Einars átti afmæli.

Á laugardaginn fórum við síðan í skemmtilegan bíltúr m. Auði og Hrannari alla leið í Landmannalaugar. Villtumst svolítið á leiðinni, keyrðum yfir bannaðar brýr, lentum í drullusokksárás, sáum fullt af bíræfnum útlendingum og dýfðum okkur aðeins í lækinn. Vúff hvað það var mikið af fólki þarna. Næsta sumar langar mig til að fara aftur þangað og vera í það skiptið yfir nótt og grilla og vera með gítar og syngja. Þeir sem vilja vera með geta skráð sig í kommentakerfinu.

Fórum svo í sundlaug og ég fleytti kerlingar (kerlingu) í rennibraut. Og svo fórum við út að borða á Fjöruborðinu. Þar var sko allt fullt af fólki. Meðal annars var þar systir mín & kó og föðurfjölskylda hennar.

Fórum síðan heim til Ausu og Hrannars og sötruðum smá bjór og enduðum (svolítið syfjuð, aðallega ég samt)á Ölstofunni.

Á sunnudaginn dreif ég mig upp á Skaga með Önnu, MÖ, Mömmu og Sigga í barnaafmæli hjá tvíburadætrum hálf-hálfsystur minnar. Eiginlega um leið og ég kom heim fórum við Einar svo í grill til Gunnars og Bryndísar sem endaði í spili og spjalli fram á nótt.

Á mánudaginn fórum við svo til minnar elskulegu stóru systur sem átti afmæli og vorum, enn á ný, í steik á pallinum hennar að borða grillmat og annað góðgæti. Oh, svo yndislegt. Er farin að halda að pallurinn hennar bara framkalli gott veður.

Eftir mjög stutt stopp heima stakk Einar upp á því að við drifum okkur í bíltúr og við ákváðum að fara í Krýsuvík. Þetta var svona kvöldferð. Mjög skemmtilegt. Keyrðum fram hjá Kleifarvatni, hættum okkur í torfærur, skoðuðum flott hverasvæði þarna sem ég hafði ekki hugmynd um að væri til, fórum inn í minnstu kirkju sem ég hef séð (Krýsuvíkurkirkja, mjög spes, fannst mér), keyrðum í gegnum Grindavík og svo heim aftur. Það er ótrúlega margt skemmtilegt á Reykjanesinu, það verð ég að segja.

Svo að þetta var bara skrambi góð helgi, þrátt fyrir að við höfum ekki farið og verið neins staðar í tjaldi.

Í síðustu viku var svo afmælið hans Einars, sem var ljómandi fínt. Fengum foreldra hans, systkini og afa í mat, en það var ansi troðið í litlu íbúðinni okkar .... en gleðifréttirnar eru þær að við þurfum ekki oftar að halda matarboð í sardínudósinni !! Því að við erum búin að finna okkur íbúð til að leigja ... og hún er heilir 70 fermetrar, sem er "bara" tvöfalt meira en íbúðin sem við erum í núna:) Hún er sko með AUKA herbergi. Og við getum haft TVÖ náttborð (sem er fjölgun um tvö)! Jei, ég hlakka svo til að flytja. Úff.

Okkur vantar samt nauðsynlega þvottavél. Ef þið fréttið af einhverjum sem vill losna við þvottavél þá hafið okkur endilega í huga. Eins vantar okkur fullt af húsgögnum ... t.d. tvö náttborð:):)

Afsakið hvað þetta er mikil upptalning

896.færsla. leiðinleg færsla

Það er nú leiðinlegt að hafa svikið lesendur bloggsins svona! Ég sem ætlaði einmitt að fara að blogga meira og skemmtilegra. En það vill bara svo til að það eru erfiðir tíma (þó ekki atvinnu þref)í lífi mínu í augnablikinu. Og mér dettur því ekkert í hug að skrifa nema neikvæðar og leiðinlegar færslur, sem ég hef engan áhuga á að deila með umheiminum. Þar að auki eru þessir erfiðleikar (sem ég ætla ekkert að fara nánar út í) orku-og tímafrekir. En jæja. Nóg um það.

Það var nóg að gera um páskana:) Á miðvikudaginn kíktu nokkrir vinir hans Einars og Ása í bjór og við fórum síðan niður í bæ.

Á skírdag grilluðum við Einar og Svava systir hans kom í mat og rauðvínsspjall.

Á föstudaginn langa fórum við Einar í góðan rúnt um Suðurnesin, keyrðum um vallarsvæðið (fyrsta skipti sem ég kem þangað, gerðist aldrei svo fræg að fara þangað á meðan herinn var hér), stóðum á brúnni milli heimsálfa og fórum að Reykjanesvita (haha svita) og þar. Enduðum svo í Bláa Lóninu sem mér finnst alltaf æðislegt. Þó að það sé náttúrulega rándýrt. Sem betur fer sko 2 fyrir 1 en jafnvel þannig allt of dýrt. Mjög góður dagur. Fórum svo í mat til foreldra Einars og foreldra mínir komu líka þangað.

Á laugardaginn var huggulegur brjönshhj hjá Önnu sys. Eftir það fórum við Einar, mamma, Anna og krakkar í sund og svo fengum við okkur borgara á stælnum. Held við Einar höfum glápt á videó um kvöldið.

Svo á páskadag þá borðuðum við páskaegg og fórum svo í mat til ma&pa klukkan tvö. Þar voru systkini og co. mínus Addi bró og hans lið. Þar voru líka amma Hlíf og Fríða frænka. Very good hamborgarahryggur yes. Svo um sjö ákváðum við að bruna til Kef og náðum fjölskyldunni hans Einars við matarborðið svo að við fengum aftur að borða þar. Hehe. Fórum svo til vinar hans Einars í bjór og spjall.

Á annan í páskum komu svo ma, pa, Anna, Magga Anna, Garðar Þorri og Siggi í mat til okkar Einars.

Og þá er það upptalið. Löng og leiðinleg upptalning. Það má alveg.

892.færsla.

Best að blogga. Er í letikasti. Annars hafa síðustu dagar verið frekar viðburðaríkir.

Á miðvikudaginn hittist vinnunördahópurinn í fimbulfamb (ég vann). Á fimmtudaginn hittist Madrídar fereykið. Á föstudaginn fór ég á Hugvísindaþing, út að borða á Vegó og í drykk á Kaffibarinn. Á laugardaginn fór ég á Hugvísindaþing, á Gullfoss og Geysi og í Sushi um kvöldið og svo á djammið. Á sunnudaginn fór ég til Keflavíkur í skírn. Á mánudaginn kenndi ég einn tíma (þó ég sé annars ekki að kenna) og um kvöldið var bókaklúbbur. Á þriðjudaginn (í gær) fór ég á kóræfingu og síðan út að borða á Santa María. Í dag er ég að fara að passa fram á kvöld. Á föstudaginn fer ég í kóræfingabúðir. Á laugardaginn fer ég (held ég) í matarboð á Suðurnesjunum (sem gæti þýtt það að við gistum þar) og... það er kannski ekki skrítið að ég sé löt og þreytt í augnablikinu. Mikið að gera og mikið að gerast.

En skemmtilegt - hefur þetta allt saman verið.

Vá hvað ég er löt. Ég nenni ekki einu sinni að blogga. Myndi fá mér kaffi, en ég nenni eiginlega ekki að sækja það.

863.færsla.j-ÓÓ-laundirbúningur

sjeett. Var í verslunarmiðstöðvum frá því klukkan 12 til rúmlega hálf sjö í dag. Fyrst í eigin erindagjörðum og svo að hjálpa elskulegustu móður minni. Árangurinn var góður. En það er samt gjörsamlega allur vindur úr mér. Og margar gjafir sem ég ætlaði að búa til ekki tilbúnar. Og ég er ekki búin að skrifa jólakortin sem ég er búin að föndra. Er farin að efast um að ég geri það, þó að mig langi. Jæja. Svona er lífið. Maður getur ekki alltaf gert allt og ég hef sko ekkert verið að slóra. Er bara á fullu sko eiginlega. Oh. það er svo mikið drasl hérna. Svo mikið af fötum út um allt. Svo mikið af pokum með jóleríi í.

Verð samt að segja að ég er búin að kaupa flest það sem ég þarf að kaupa. Svo verður bara að koma í ljós hvort ég næ að búa til allt það sem ég ætlaði að búa til, annars verð ég bara að fara í búðir á síðustu stundu og kaupa þær gjafir sem ekki verða tilbúnar. Jæja. Nú ætla ég að gera lista og borða kvöldmat.

P.s sá Pál Óskar í dag.

860.færsla.

Það er svo margt að segja.

Smá stresstörn er lokið. Síðustu vikuna í nóvember var mikið að gera í kennslunni sem endaði með munnlegu prófi á föstudeginum. Það fannst mér örugglega álíka stressandi og nemendunum. Svo fór ég á fund með mastersnefndinni og þaðan beint á koffíhás að hitta stelpurnar. Við hittumst allt of sjaldan. Á laugardeginum var síðan laufabrauðsmaraþonið, en ég held við höfum skorið út og steikt 160 kökur. Ég sat án gríns í tæpa fimm tíma og skar eins og ég ætti lífið að leysa. Mér finnst þetta samt svo ógjó gaman að ég kvarta ekki undan því. Á sunnudeginum fór ég síðan á yndislega útgáfutónleika hjá Nýja kvartettinum, en Addi elsti bróðir minn spilar í honum. Mæli alveg með þessari plötu. Og svo bjó ég til aðventukrans. Fyrsta aðventuhelgin var sem sagt mjög jólaleg og góð.

Svo tók við seinni hluti stressins, en við Einar höfðum ákveðið að halda saman fyrirlestur á stórri ráðstefnu sem var núna um helgina. Samvinnan gekk asskoti vel, sem kom mér eiginlega á óvart því að það er ekki alltaf auðvelt að vinna með fólki sem er svona náið manni. En þetta endaði auðvitað í heljarinnar stressi, sérstaklega daginn fyrir ráðstefnuna þegar allt sem við höfðum gert gufaði upp fyrir klaufaskap. Til allrar hamingju gat reiknistofnun fundið skjalið (reyndar eldri gerð) sveimandi á veraldarvefnum, eða eitthvað. Svo um kvöldið fékk ég allt í einu þá tilfinningu að við værum algjörlega að klúðra hugtökunum og fannst ég ekki skilja NEITT í þessu. Fékk smá svona taugaáfall en það reddaðist:) Svo hélt ég fyrirlesturinn eftir mjög lítinn svefn, og var frekar illa undirbúin fyrir flutninginn, sem stressar smá þegar maður þarf að halda þetta á útl-ensku. En svo gekk þetta bara vel:) Allavega fengum við hrós frá frægum útlenskum málfræðingi og það er ekki leiðinlegt. Svo erum við Einar, samkvæmt ráðstefnubæklingnum, doktorsnemar sem hlýtur að þýða það að ég þurfi ekkert að vera að gera þessa mastersritgerð fyrst ég er þegar komin í doktorinn:) eða hvað.

Sem sagt: mikill léttir að vera búin að þessu.

Í gær hittumst við mæðgur og bökuðum á fullu heima hjá Önnu sys. Já og pabbi líka og Garðar Þorri en þeir fengu ekkert að baka, sá fyrrnefndi passaði þann síðarnefnda svo við fengjum frið til bakstursins. Magga litla var rosa dugleg að baka, það var bara heilmikil hjálp í henni þó að hún sé ekki einu sinni orðin fjögurra.

Já og nú á ég bara eftir að redda 4000 jólagjöfum eða svo. Einhverjar þeirra eru í vinnslu, en það tekur skrambi langan tíma. Ég hef ekki einu sinni hugmynd um hvað ég ætla að kaupa handa neinum. Jæja þetta reddast. Fyrst jólin 2002 redduðust þá reddast allt. Þá var ég í prófi til 21.des, mætti, ósofin og taugatrekkt, beint eftir prófið í laufabrauðsmaraþonsskurðinn, og síðan um kvöldið var próflokafagn með vinkonunum. Vaknaði þunn og þreytt þann 22., og átti þá eftir að kaupa ALLAR jólagjafirnar, hringdi í bankann og komst að því að ég átti bara tæpar 2000 krónur inni á reikningnum. En það reddaðist: svo það reddast allt.

Og ég hlakka ýkt til.

723.færsla. frá miðvikudagsmorgni til sunnudagskvölds

Síðustu dagar hafa verið viðburðaríkir, svo ekki sé meira sagt. Af þeim sökum hef ég sama og ekkert komist á netið síðan bara á afmælinu mínu. En nú ætla ég að skrifa langa og leiðinlega færslu.

Miðvikudagur:
Afmælisdagurinn minn. Virkilega mj. góður dagur. Kærastinn hafði planað að hafa óvænta morgunveislu (eins og siður er í minni fjölskyldu (þó ekki óvæntar endilega)) og hafði skipulagt hana í þaula, boðið sys og mömmu að koma og diktaði upp afsökun fyrir því að hann þyrfti að fara til Keflavíkur (til að baka kökur). Nema hann var svo sannfærandi þegar hann kom með afsökunina daginn áður að ég varð ægilega móðguð yfir því að hann væri bara eitthvað að fara til Keflavíkur á fyllerí svo hann neyddist til að segja mér réttu ástæðuna svo ég færi ekki í algjöra roknafýlu. Ég skyldi ekki í því hvað honum var skemmt yfir því hvað ég var fúl. Svo veislan var ekki óvænt en engu að síður ákaflega góð. Svo fórum við aðeins í skólann og síðan út að borða. Um kvöldið kíkti síðan hluti fjölskyldunnar í kaffi. Alveg frábær dagur. Takk, allir, fyrir mig og allar kveðjurnar sem ég fékk á blogginu, facebúkkinu, sms-um eða í samtölum.

Fimmtudagur
Þessi dagur er horfinn úr minni mínu með öllu. Skil ekki hvað varð um hann.

Föstudagur
Sys fer upp á spítala. Ég fer og sæki barn á leikskóla og á meðan fæðist litli bróðir barnsins. Við borðum pizzu, leikum okkur, horfum á Shrek o.s.frv. þangað til litli bróðir kom heim í fylgd foreldranna næsta dag, þ.e. á

laugardeginum. Ég þurfti nú aðeins að fá að halda á litla frænda, sem er ósköp sætur og ósköp lítill. Síðan förum við Einar í þorramat til Keflavíkur og eftir það í partý.

Sunnudagur
brunum í bæinn. Tökum til og undirbúum smá veitingar því ég hafði boðið nokkrum vinkonum í síðbúið afmæliskaffi. Þar ræddum við aðeins nám, barneignir, lýs, flatlýs, kláðamaur og blóðsugur og enduðum í hressilegum umræðum um innflytjendur og fréttaflutning af þeim. Mj. skemmtilegt að fá stelpurnar í heimsókn, þ.e. að segja þær sem eru á landinu.

Og þetta er nú það. Ég veit ekki hvort það kom skýrt fram í þessu bloggi, en ég er búin að vera gjörslamlega á þönum síðan á miðvikudaginn og hef lítið annað getað gert en að halda upp á afmæli og fylgjast með litlum börnum. Æ. Þau eru svo sæt.

596. færsla. lífsmark

Ég er á lífi, í alvörunni.
Ég er bara allt of busy til að blogga.
Og svo á ég í smá tæknilegum vandræðum...

Allavega! Auka afmælisdagurinn minn er í dag, held ég. Er ekki annars bóndadagurinn í dag?